Þar sem djöflaeyjan rís og Gulleyjan komu fyrst út 1983 og 1985 og náðu strax geysimiklum vinsældum. Sögurnar fjalla um Reykjavík eftirstríðsáranna; skrautlegt mannlíf í braggahverfi og allt það umrót sem örar samfélagsbreytingar höfðu í för með sér. Söguhetjur bókanna eru meðal minnisstæðustu persóna í íslenskum skáldskap síðari ára og uppákomurnar ævintýralegar, enda er frásagnargleðin helsta kennimark höfundarins. Hér eru þessar tvær skáldsögur Einars Kárasonar saman í einni bók með formála eftir Auði Jónsdóttur rithöfund.

Fljótlega eftir útkomu „Eyjabókanna“ var gert eftir þeim leikrit og sýnt við mikla hylli. Eins hafa þær verið kvikmyndaðar: Einar og Friðrik Þór Friðriksson skrifuðu handrit Djöflaeyjunnar sem var frumsýnd 1996. Nú hefur einnig verið saminn söngleikur byggður á bókunum.

Einar Kárason er meðal allra vinsælustu höfunda þjóðarinnar og margverðlaunaður. Hann hefur meðal annars verið tilnefndur til Bókmenntaverðlauna Norðurlandaráðs fjórum sinnum og jafn oft til Íslensku bókmenntaverðlaunanna sem hann hlaut 2008.

Bækur hans hafa verið gefnar út víða erlendis.