Hecula ilmar af svörtum kirsjuberjum, greni og kryddi. Dökkt öflugt Monastrell vín frá Yecla á Suð-Austur Spáni. Robert Parker gaf 2000 árgangi 92/100 í einkunn, 2001 91/100, 2002 og 2003 90/100 og játar í riti sínu, Wine Advocate, að hann hafi aldrei gefið jafn ódýru víni jafn háa einkunn.
Vínið stendur vel undir þeim væntingum sem slík einkunnagjöf skapar. Nú hefur það opnazt með ilmi af grilluðu kjöti, dökkum berjum og pipar. Minnir því óneitanlega á gott Rónarvín, s.s. Chateauneuf du Pape, en Monastrell (fr. Mourvedre) er einmitt ein af Rónarþrúgunum.
Vínið er þétt undir tönn, mjög ávaxtaríkt, bragðmikið með talsverðu kryddi, pipar, negli (þgf. negull) og rúsínu- og döðlukeim í alllöngu eftirbragði.
Þetta er nördavín, sem loksins er að verða aftur aðgengilegt hinum almenna óinnvígða og ómúraða borgara.
Hentar með öllu kjöti, grilluðu og talsvert krydduðu, og afar vel með svínakjöti, ekki sízt marineruðu.

Penni þeirra Spánverja, José Peñín, gefur árgangi 2023 90/100 og fimm stjörnur fyrir verðgildi [sp. Calidad/Precio]:***** / *****

Jarðvegur: kalksteinn.
Meginlandsloftslag mildað af nálægð við Miðjarðarhafið
Uppeldi: 6 mánuðir á frönsku (80%) og amerískum (20%) tunnum.
Lýsing víngerðarmanns: Glansandi miðlungsdjúpur rúbínrauður litur. Skýrir tónar af þroskuðum rauðum ávöxtum, plómum og berjum með nettum ristuðum ilmi. Ljúft á gómnum, með hindberjasultu ásamt örlitlum keim af vanillu og kakói. Gott jafnvægi með fínlegum þægilegum endi.