Fuglar himinsins hafa löngum verið okkur mönnum tákn frelsis og við höfum dáðst að fegurð þeirra, margbreytileika og undrast leyndardómana sem umlykja þá, því margt í lífsvenjum þeirra og hátterni er okkur enn hulið. Í þessari glæsilegu bók er lesandi leiddur inn í heillandi heim íslenskra fugla. Fjallað er um lifnaðarhætti þeirra og lífsskilyrði, sagt frá flugi, fæðuöflun, varpi og uppeldi unga, og lýst kjörlendi þeirra. Hér er í fyrsta sinn fjallað ítarlega á íslensku um hátterni fugla og þá er brotið blað með skipulagðri umfjöllun um sjálfa undirstöðu allrar fuglaverndar: búsvæðavernd. Í bókinni er jafnframt lýst sérhverri tegund íslenskra varpfugla í máli og myndum, og inn í þá frásögn er fléttað efni úr þjóðtrú og skáldskap. Bókin er prýdd miklum fjölda skýringamynda, teikninga og korta, en ekki síst eru ljósmyndir bókarinnar einstakar í sinni röð og má fullyrða að aldrei áður hafi birst á einni bók svo margar frábærar ljósmyndir af fuglum í leik og starfi.