Á grófri upptöku úr eftirlitsmyndavél sést hvar maður gengur inn í banka og beinir byssu að höfði eins gjaldkerans. Hann skipar konunni að telja upp að tuttugu og fimm. Þegar hann hefur ekki fengið peningana afhenta innan þess tíma er hún hiklaust tekin af lífi.

Rannsóknarlögreglumanninum Harry Hole er falið að rannsaka málið. Á meðan unnusta hans er í Rússlandi hefur gömul kærasta samband við hann og eftir kvöldverð heima hjá henni vaknar Harry upp án þess að muna nokkuð frá síðustu klukkustundum. Um morguninn finnst stúlkan látin í rúmi sínu og fljótlega fara Harry að berast skuggalegir tölvupóstar. Er verið að reyna að koma á hann sök á láti hennar? Meðan Harry berst við að hreinsa mannorð sitt halda bankaránin áfram með fordæmalausum óhugnaði …

Jo Nesbø er norskur hagfræðingur, rokktónlistarmaður og metsöluhöfundur en bækur hans um rannsóknarlögreglumanninn Harry Hole hafa farið sigurför um heiminn. Nesbø hefur hlotið fjölda verðlauna og viðurkenninga og þegar lesendur Dagbladet völdu bestu norsku glæpasögu allra tíma í kosningu árið 2009 átti Nesbø þrjár vinsælustu bækurnar og allar glæpasögur hans var að finna meðal þrettán efstu á listanum.

Nemesis er önnur bók Nesbø sem kemur út á íslensku. Rauðbrystingur sló í gegn á Íslandi með eftirminnilegum hætti er hún kom út árið 2009. Í ársbyrjun 2010 var Nemesis tilnefnd til hinna virtu bandarísku Edgar Allan Poe verðlauna sem besta glæpasaga ársins. Publishers Weekly valdi Nemesis eina af 100 bestu bókum ársins 2009 í Bandaríkjunum úr tugum þúsunda titla.

Bjarni Gunnarsson þýddi.

ATH. Hljóðbókin er afhent rafrænt og hægt er að hlusta á hana beint í gegnum app Forlagsins eða vafra. Hér má lesa meira um hljóðbækur fyrir appið.

Hljóðbókin er 19 klukkustundir og 1 mínúta að lengd. Orri Huginn Ágústsson les.