„Ekki er til ömurlegri bölvun en að fæða fallegt meybarn í veröld karla sem eru illskeyttir sem lóðahundar.“

Vændiskonan fagra, Dewi Ayu, rís upp eftir tuttugu og eitt ár í gröfinni til að hefna fyrir hörmungarnar sem dætur hennar og afkomendur hafa mátt þola; sifjaspell, morð, ofbeldi, nauðgun, geðveiki. Fegurð er sár sameinar fjölskylduharmleik, þjóðsögur, sögulegar staðreyndir og rómantík í þétt ofinni frásögn úr framandi umhverfi sem tekur á sig blæ töfraraunsæis.

Jafnhliða ógleymanlegum sögum af fegurð og grimmd rekur indónesíski rithöfundurinn Eka Kurniawan örlög þjóðar sinnar og baráttu við nýlenduherra, hernámslið, einræðisherra og spillingu. Fegurð er sár hefur vakið heimsathygli og hlotið ýmis verðlaun og viðurkenningar, þar á meðal Publishers Weekly Best Books 2015 og World Readers’ Award 2016.

Ólöf Pétursdóttir þýddi.