Höfundur Anna Rún Frímannsdóttir
„Hún var hætt að berjast á móti. Óreglulegu kippirnir í líkamanum hættu snögglega, augun voru starandi og munnurinn skældur … Skaðinn var skeður og gjörðum hennar yrði ekki breytt. Ef hún hefði aðeins látið kyrrt liggja og hætt að grúska í fortíðinni.“
Ung kona finnst myrt á heimili sínu og rannsókn málsins miðar hægt. Hin látna virðist hafa verið dáð og elskuð af öllum sem hana þekktu og ástæður voðaverksins eru á huldu.
Hrefna hefur starfað á lögmannsstofunni Skildi frá útskrift en þar sinnir hún aðallega þinglýsingum, skilnaðarpappírum og annarri skriffinnsku. Þegar morðmál dettur óvænt inn á borð hennar teygja þræðir málsins sig í ófyrirséðar áttir og Hrefna þarf að leggja allt í sölurnar til að fóta sig í nýju hlutverki. Er Hrefna að kafa of djúpt og storka örlögunum?
Dauðaþögn er spennandi saga um ofbeldi, þöggun og blekkingar. Bókin er fyrsta skáldsaga Önnu Rúnar Frímannsdóttur.
