Dag einn er blaðamaðurinn Kaarlo Vatanen í vinnuferð með samstarfsmanni sínum sem í ógáti ekur á héra. Hérinn stekkur særður út í skóg og Vatanen æðir á eftir honum. Félaginn gefst upp á að bíða eftir að Vatanen komi til baka og skilur hann eftir í skóginum.

Þar með hefst atburðarás sem á eftir að umturna lífi Vatanens. Hann segir skilið við sitt fyrra líf, eiginkonuna og starfið og næsta árið þvælist hann um Finnland þvert og endilangt ásamt ferðafélaga sínum, héranum.

Ár hérans er einstök saga sem höfðar til allra aldurshópa og er svo grípandi og fyndin að lesandinn hrífst með frá upphafi. Bókin er þekktasta og mest lesna saga Artos Paasilinna. Hún hefur tvisvar verið kvikmynduð.