Sumarið eftir tíunda bekk snýst líf Jóels, Álfhildar, Tomma og Hildigunnar um sumarvinnu, fótbolta, óvæntar uppákomur og einlæg samskipti. Allt gengur sinn vanagang þangað til Ania birtist. Hún er ólík öllum sem Jóel hefur hitt og eftir að hún sest fyrirvaralaust við borðið hans á Bláu könnunni rekur hver furðulegi atburðurinn annan. Og tölvan sem Jóel situr uppi með eftir að Ania lætur sig hverfa geymir vísbendingar sem varða framtíð Íslands.

Fáir hafa slegið jafnrækilega í gegn meðal lesenda á unglingsaldri og Þorgrímur Þráinsson. Með núll núll 9 fylgir hann eftir bókunum Svalasta 7an og Undir 4 augu sem notið hafa gríðarlegra vinsælda.

***
„Bókin er spennuþrungin og mjög skemmtileg.
Maður leggur bókina ekki frá sér fyrr en hún er búin og er hún tilvalin í jólapakka fyrir unglinga.“
Marta María Arnarsdóttir, 13 ára / pressan.is

***
„Þorgrímur er flinkur sögumaður … hér er hvergi dauður punktur, æsingurinn heldur áfram og verður æ alþjóðlegri í sniði.“
Páll Baldvin Baldvinsson / Fréttablaðið

„Spennusagan og saga Jóels mynda umgjörð um mjög skýran boðskap, annars vegar til þjóðarinnar um að standa vörð um auðlindir sínar og gefa ekki höggstað á sér á tímum kreppu og hins vegar boðskapurinn um að hetjuskapur og hugrekki felast ekki í ytra byrði, umbúðum eða ofurgræjum á borð við þær sem James Bond býr yfir. Hvað hina hversdagslegu hlið sögunnar varðar er Þorgrímur algjörlega á heimavelli og greinilegt að hann kann vel að skrifa góða unglingasögu. … ég vil endilega lesa meira um unglingspiltinn Jóel, sem ég held að sé geðugasta ungmenni sem ratað hafi í unglingabók fyrr og síðar.“
Guðríður Sigurbjörnsdóttir / bokmenntir.is