Hvað sá konan í glugganum?

Sálfræðingurinn Anna Fox hefur ekki stigið út undir bert loft í tíu langa mánuði; hún ráfar um stóra húsið sitt eins og vofa, týnd í minningum sínum og þokkalega góðu rauðvíni. Sambandinu við heiminn fyrir utan heldur hún með því að fylgjast með nágrönnum sínum út um gluggana, og þegar Russell-fjölskyldan flytur í húsið handan garðsins heillast hún undireins. Þau eru eins og spegilmynd af fjölskyldunni sem hún átti.

Eitt kvöldið rýfur óhugnanlegt óp kyrrðina og Anna verður vitni að atviki sem enginn átti að sjá. En sá hún það í raun og veru? Og mun einhver trúa henni?

Konan í glugganum er fyrsta skáldsaga A.J. Finn en á bak við það nafn dylst bandaríski bókaútgefandinn og ritstjórinn Dan Mallory. Áður en sagan kom út á frummálinu hafði hún selst til nærri fjörutíu landa og kvikmynd er í undirbúningi. Bókin er tilnefnd til Ísnálarinnar 2018, verðlaun sem eru veitt fyrir best þýddu glæpasöguna á íslensku.

Friðrika Benónýsdóttir þýddi.