Nú er Hjólabókin komin austur. Á Austurlandi er aldeilis hægt að hjóla. Þar er eitthvað fyrir alla sem kunna það. Um það fjallar bókin í máli, myndum, kortum og táknum. Það er komið að Austurlandi. Nýtt og spennandi svæði fyrir höfund bókarinnar. Landið er fjölbreytilegt og leiðirnar líka. Það var gaman að vinna þessa bók og markmiðið er að það verði líka gaman að nota hana. Hér er lýst þrettán hjólreiðaleiðum, auðveldum og erfiðum, sem eiga það sameiginlegt að þær liggja í hring og að hægt er að loka hringnum á einum degi. Hverri leiðarlýsingu fylgja tillögur að fleiri ferðum. Auka kaflar eru um hagnýt efni. Helstu upplýsingar um hverja leið eru útlistaðar í máli, á kortum og með hæðarprófílum. Allar leiðirnar eru teiknaðar með litaskala sem útskýrir hve brattinn er mikill. Rúmlega 200 ljósmyndir gefa innsýn í landshlutann, hvernig þar er umhorfs og hvers konar vegir og stígar bíða lesenda.
